Cebu Daily News / Opinion

http://globalnation.inquirer.net/cebudailynews/opinion/view_article.php?article_id=213311

SUPER HIRIT Super Hirit : Comelec ongoing registration langay gihapon By Lloyd Suarez Cebu Daily News Posted date: July 01, 2009 Useless ra diay gihapon kining paghugop sa mga tawo diha sa lain-laing buhatan sa COMELEC nga buot magpa-rehistro kini tungod kay gamay ra ang ma-accommodate sa tibuuk adlaw nga transaksiyon. Niadtong Sabado atul sa among programa’ng “Dialogue On The Air” sa DYSS mi-angkon ang mga kadagkuan sa Comelec nga dili gyud nila kaya nga mapaspasan ang pagpang-rehistro sa mga botante nga tapuson na karong katapusang adlaw sa October. Kuwang kaayo sila sa gitawag ug “Data Capturing Machines” o DCM. Si Atty. Edwin Cadungog sa Cebu City Comelec South mitug-an nga duha ra gyud intawon ang ilang DCM. Si Atty. Marchel Sarno sa Cebu City COMELEC North miingon nga duha ra sab ang anaa sa iyang buhatan pero dunay coming nga usa. Sa Mandaue City Comelec dunay usa ka DCM segun pa ni Atty. Ferdinand Gujilde. Si Atty. Leonel Marco Castillano nga maoy Provincial Election Supervisor nga mitambong usab sa maong programa miingon nga ang hinungdan niining kakuwang sa mga machines tungod kay wa nay kuwarta ang ilang ulohang buhatan. Usa sa hinungdan nga mo-grabe ang kalangay sa pagpang-rehistro mao nga mokalit lang ug kaguba ang mga machines. Si Atty. Castillano nagkanayon nga tulo ra gyud ka mga computer technicians ang naglihok karon intero Sugbu. Buot ipasabot nga kun magdungan ug kaguba ang mga units maabtan gyud ug siyam-siyam una makabalik sa normal nga operations. Taliwa nga duna na sila’y request nga gipaabot sa Manila COMELEC bahin sa kakuwang sa DCM apan wa pay positive nga response. Maglaum ko nga pangitaan kini nila ug paagi aron masulbad ni’ng yango-ngo sa katawhan. Way plano ang taga COMELEC nga mo-overtime hangtud alas 9:00 sa gabii ug magsugod pag-transact sa buntag inig alas 7:00? * * * Akong mga paryente sa Casay Dalaguete mipadayag intawon ug mga pagmahay sa among “parish priest” nga si Fr. Benjamin Cortes tungod kay dili na mopahigayon ug Santos nga Misa sa among Kapilya atul sa fiesta karong Hulyo 12 sa among segunda patron Sr. San Pedro. Ang rason tungod kay matud pa dili i-donate sa tag-iya ang lote nga giugbukan sa among Kapilya ngadto sa Archdiocese sa Sugbu. Akong maestra kaniadtu nga si Ma’am Epifania Commendador Caruz kinsa maoy milingkod nga presidente sa kapunongan sa Kapilya mitug-an nga ang tag-iya sa lote mipasabot atul sa ilang tigum nga dili i-direkta pag-donate ngadto sa simbahan kay adto lang sa kapunongan. Miingon si Ma’am Panie nga tungod niini, sugod karong pistaha sa kang Sr. San Pedro ug ingon man sa kang Sr. San Vicente Ferrer sa Nobyembre wa nay misa nga ipahigayon sa Kapilya kay mao nay patakaran sa simbahan. Ang misa adto na himoon sa daku’ng simbahan sa Santa Monica Parish Church sa Barangay Cawayan nga midistansiya ug dul-an tulo ka kilometro. Kini maoy pinaka-unang higayon nga wa nay misa sulod sa 80 ka tuig nga milabay segun sa mga katigulangan. Matud pa ni Ma’am Panie nga alas 4:00 sa hapon ang misa didto sa Cawayan ug kinahanglang ang procession magsugod ug alas 3:00 sa hapon paingon didto sa simbahan. Ang mga devotees nga mga tigulang miingon nga maglisod na gyud intawon sila ug lakaw sa layo. Nakasabot ko sa baruganan sa simbahan pagpa-donate sa lote kini aron dili na mahilabtan ang gipaka-sagrado’ng puluy-anan sa Diyos. Si padre Ben igo ra sa’ng misunod sa memorandum circular ni Cardinal Vidal bahin niining pagpa-donate ngadto sa simbahan niining mga lote nga giugbukan sa mga Kapilya. Pero in fairness sa tag-iya sa lote miingon na nga adto lang kini i-donate sa kapunongan. Alang nako wa ko’y nakitang rason dinhi nga mabalaka ang simbahan. Nahinumdum ko sa akong subject sa Theology kaniadtu nga ang tukmang definition sa simbahan mao ang katawhan. Unya ang kapunongan nagpasabot nga pundok sa katawhan. Mao nga moingon ko nga dili gyud mabalaka niini ang mga kadagkuan sa Simbahan bisag dili kini iderekta pag- donate kanila kay possible nga mo-abot ang mga adlaw nga ang mga opisyales sa Kapilya mao na’y mo-donate ngadto sa simbahan. Manawagan lang sab ko nila’ng Cardinal Vidal ug ni padre Ben nga misahan gyud nila ang Kapilya ug dili nila i-hostage ang sitwasyon tungod lang niining isyu sa deed of donation. Ang pag-donate baya dili pinugsanay kun dili usa kini ka bolontaryo. Kun wa gyu’y misa nga mahitabo tabla ra nga pinugsanay gyud ang katuyu-an sa mga church officials. Way plano si Fr. Ben nga maoy mokonbinse sa tag-iya sa lote pagpa-donate? Akong tan-aw niini kuwang ra gyud sa pagpasabot.