Kaniadto pa ko nanawagan sa atong mga huwes nga mas maayong dili na lang gyud modawat niining cash incentives gikan sa Cebu City Hall ug sa Kapitolyo dihang giputlan og kalit si retired Regional Trial Court (RTC) judge Ramon Codilla kaniadto sa iyang monthly allowance ni Cebu City Mayor Tomas Osmeña. Dili kalikayan nga kining atong mga local chief executives nga mapildi sa ilang kaso diha sa korte mamoyboy ngadto sa mga huwes. Morag maoy mga tag-iya sa allowance.Sa kang judge Codilla nga nahitabo gideretso og papas iyang pangan sa listahan sa mga recipients dihang mipagawas og ruling nga dili pabor sa syudad bahin niadtong mga impounded Mandaue-bound public utility jeepneys diin ang order sa huwes ipa-release ngadto sa mga operators ang mga dinakpan nga mga sakyanan. Ang nahitabo ni judge Codilla nasubli na sab kini ngadto nila ni Judge Bienvinido Saniel sa Cebu City RTC Branch 20 ug sa kang Judge Leopoldo Cañete sa Barili RTC diin ang taga-Kapitolyo na say responsable sa pagputol sa ilang allowance. Mga huwes sa Palace of Justice mikompirmar na niini nga giputlan ni Gov. Gwendolyn Garcia si Judge Saniel tungod niadtong pag-dismiss sa huwes sa kasong declaratory relief nga gi-file sa Kapitolyo batok ni Mayor Tomas Osmeña sa pagtudlo og board member sa MCWD. Gani nakigtagbo na sila si Acting Executive Judge Silvestre Maamo kang Governor Garcia sa posibleng paghilot niini. Apan ang tinubdan wa’ pa kaayo makahatag og detalye sa kang Judge Cañete kay matud niya nga taas kaayo ang estorya. Matud pa, ang nasuk-an sa Kapitolyo kang Judge Cañete tungod lang kay ang mga desisyon wa’ magsubay sa insaktong jurisprudence. With all due respect, mga ngilngig man unta ning mga abogado sa Kapitolyo ug pwede pa man unta nilang i-contest ang mga desisyon nga wa’ sila kauyon. Ambot lang kun wa’ ba mabiktima si Governor Garcia og sulsol sa iyang mga alipores diha. Kun ingon niini ang mahitabo nga magawngan ang judicial independence sa atong mga huwes tungod lang sa allowance sa LGU, mas maayong undangon nila ang pagdawat. For delicadeza, mas maayong dili na gyud sila modawat og allowance gikan sa City Hall ug sa Kapitolyo kay kining away nilang Mayor Tom ug Governor Gwen bahin sa mga province-owned lot mosangko kini sa husgado. Gani pending na karon sa korte ang pagbawi sa Kapitolyo sa Fuente Osmeña oval. Gawas pa, sa estado karon sa atong mga huwes nga dagku na og sweldo ug mga allowances gikan sa Korte Suprema, bastante na man tingali ilang pagpuyo uban sa pamilya. * * * Salamat nga gipaminaw nila ni Capitol Consultant Byron Garcia ug Governor Garcia kadtong akong hangyo nga isuspenso kining ilang pagpangolekta og P10 sa mga taxi units nga mosulod diha sa South Bus Terminal. Si Byron mitug-an kanako niadtong Biyernes nga effective ugmang adlawa, Martes, ila nang suspensuhon ang entrance fee sa mga taxi. Iyang giklaro nga ang suspension sa entrance fee sa mga taxi gikan sa Oktubre 28 hangtud na sa Nobyembre 2 nga nahug lang og unom ka adlaw. Iyang gipasabot nga kun dili lang makaapektar sa income sa Kapitolyo, posible nga wagtangon na nila kining pagpangolekta sa entrance fee. Maayo unta nga wagtangon na kini sa hingpit aron dili na mag-away ang driver ug ang pasahero kun kinsay mobayad sa entrance fee. * * * Pwerte na gyung pangandam karon sa pamilyang Guardo sa umaabot nga 2010 elections. Si Jonathan Guardo, nga napilde ni Kongresista Antonio Cuenco, mitambong sa among programang Barangayan niadtong Sabado sa Barangay Sambag I ug mianonsyo nga ilang gi-organize karon ang kababainhan dinhi sa Cebu City. Matud ni Jonathan nga ang Guardo Foundation dunay gitawag og programa nga social responsibility ug sentro sa iyang programa mao ang pagpanghatag og libreng lungon ngadto sa ilang mga myembro nga kabus kaayo. Mipasangil siya sa taga-City Hall ug sa Bando Osmeña-Pundok Kauswagan nga kining pauper’s burial diha sa City Hall para ra sa mga konstituwente nga dumadapig nilang Mayor Osmeña. Manghinaut lang ko nga dili mosangpot sa pag-inilugay unya og patay sa BOPK ug sa grupo nilang Guardo. Pastilan gyud ning pulitika. | 
