Dihang gipangutana ang inilang bayot nga singer-composer sa England nga si Elton John kabahin sa iyang pantasya, ingon niani ang iyang tubag: Gadagan siyang gahubo sa dakong kawanangan samtang gauwan og kwarta ug gisugat ug gigakos siya sa mga tao nga wa manumbaling sa kwarta.Kining maong pantasya daw susama sa padagan sa ambisyon ni Kobe Bryant, nga gustong mahinumduman isip Numero Uno nga mangduduwa sa basketball. Ang nakalahi lang sa kang Kobe mao nga dili ang mga tao maoy importante kon dili ang history ug ang records sa duwa. Mao nga way kahadlok si Kobe nga moabri sa iyang kinabuhi kay para kaniya ang bugtong importante nga butang mao ra ang basketball. Susama sa pari nga palahubog sa nobela ni Graham Greene nga The Power and the Glory nga miingon nga all that matters is to be a saint, kang Kobe, all that matters is to be No. 1. Para niya bahala na nang kaso sa rape, ambak-ambak sa awto ug mga bitin, puros ra na sila pakapin. Karong semanaha sugdan na ang championship sa NBA diin ang team ni Kobe nga Los Angeles Lakers makigbangga sa Boston Celtics. Ika-11 na kining panagtagbo ning duha ka team. Sa unang 10 nila ka panagtagbo kawalo makadaug ang Celtics ug kaduha lang ang Lakers. Sa ila hinuong unang mga pagbangga wala pa sa Los Angeles ang Lakers kay didto pa man kini sa Minnesota. Apan dili kining ilang giingon nga tradisyon maoy makapaikag sa mga Pinoy sa pagtan-aw ning maong best-of-seven series. Ang kadaghanan sa manan-aw niani motan-aw kay buot sila nga mapildi si Kobe. Nganong galagut man sila ni Kobe? Kay kuno hambugero. Intawon sad uy. Arte ra na. Padugang sa pusta. Kon naglagot mos iyang linihukan, aw, nadala mos pasakay.
Unsa pay laing gikalagutan ni Kobe? Di sila ganahan nga mapulihan si Jordan ni Kobe. Dili man tingali malalis nga siya karon ang bag-ong Jordan. Parehas silag coach. Parehas ang opinsa nga ilang giduwaan – ang triangle offense. Tingali mutuo usab kini si Kobe og numerology mao nga iyang gipausab ang iyang numero sa uniporme. Ang iyang number 8 gipausab niya ngadto sa number 24 para molabaw siyag usa sa kang Jordan nga number 23. Ang lain pa nilang gikalagutan mao nga nang-rape kini. Wa man tingali mo didto sa lawak pagkahitabo niadto busa angay lang tingali ninyong dawaton ang desisyon sa ilang mga korte sa balaud didto. Ang pinakabag-o tingali nilang gikalagutan mao kadtong iyang pag-ambak sa usa ka awto (Aston Martin) ug kadtong iyang pag-dunk ibabaw sa usa ka pool sa mga bata nga gilanguy-languyag mga bitin. Kon kamo galagut ni Kobe nasud lang kamo sa iyang laang. Kay mas daghan ang mobatok kaniya mas madasik siya. Buot niyang ipakita nga bisag ang tibuok kalibutan pa mobabag niya, dili kini makasanta sa iyang plano nga mag-Numero Uno sa duwa. Kon galagut ka ni Kobe tungod ning maong mga rason, dili na ka original. | 
