Dili na gyud malikayan nga makakwestyon si Juan de la Cruz karong mga panahuna sa bisan unsang programa sa Arroyo administration niining duha na lang ka tuig niyang pagduma sa nasud. Usa tingali ko sa pipila kanato ang nagpangagho niadtong pag-anunsyo sa Presidente atul sa National Food Summit didto sa Clark Freeport Zone niadtong miaging semana nga mopagawas ang gobyerno pg P48.7 billion alang sa pagpalambo kuno sa atong agrikultura.Usa sa mga plano sa Presidente nga magtudlo siya ug Deputy Ombudsman for Agriculture aron kuno pagseguro nga mapunta gyud sa mga nalatid nga programa ang kantidad. Unsa kahay pagtuo sa Presidente sa mahimong Deputy Ombudsman for Agriculture? Nagtuo siya nga santos nga dili mahaylo? O superhero nga maoy makabantay sa naghitak nga corruption sa agriculture sector? Naay issue sa fertilizer scam ni Jocelyn “Joc-Joc” Bolante, wa gani makahimog lakang ang Malacañang aron mapugos si Bolante pagpauli dinhi sa Pilipinas aron imbestigahon. Akong tan-aw pagkagubot kaha niining mga katungdanan sa Department of Agriculture kay posibleng ilugan sa mga kurakot sa gobyerno ang pagpahimutang diha kun madayon kining maong pundo. Hasta kapila kaha kita magpuli-puli og kalihim ning maong buhatan? * * * Dunay usa ka controversial nga kaso nga kinahanglang imbestigahon ni S/Supt. Carmelo Valmoria, hepe sa kapulisan dinhi sa lalawigan sa Sugbu, kay iyang mga sakop ang nalambigit ning maong issue. Kini kabahin niadtong gihimong pagpangronda sa taga-PNP CPPO-Provincial Intelligence Branch batok kang Jose Jeffrey Maria, alyas Tata, didto sa Tuyan, Naga, niadtong Oct. 25, 2007, sa kasong Violation of Section 11 and 12 sa Republic Act 9165. Gi-dismiss ni Naga OIC City Prosecutor Aida Sanchez ang kaso batok kang Mr. Maria kay medyo naklaro ni Piskal Sanchez nga dunay tinunto sila si Inspector Wilfredo Pulvera ug ang mga kaubang police officers nga sila si Inot ug Puao. Dakug pagduda si Sanchez nga tinunto gyud ang pagpangronda sa mga pulis tungod kay higayon na unta kaayo sa mga pulis ang pagdakop sa respondent atul sa ilang test buy nga medyo mag-atubang pa og daku nga kaso apan wa dakpa. Gawas niini dunay mga discrepancy sa mga records niining maong kaso. Usa sa nasubay ni Piskal Sanchez mao nga sa deposition nga nakuha sa sala ni RTC Judge Ramon Codilla, dili si Mr. Maria maoy subject sa raid kun dili usa ka Mr. Rodrigo Bejer nga taga-Balud, Dalaguete. Nakapalibog usab sa piskal kay sa records sa kaso na-establish nga mas nauna ang pagpaeksamen sa shabu nga giingong nakuha kay sa actual nga petsa sa pag-test buy. Mao nga gi-dismiss sa piskal kay iyang tan-aw dili gyud makabarug ang asunto ngadto sa korte. Alang nako mas maayong imbestigahon kini ni S/Supt. Valmoria kay posibleng gisayop-sayop sa iyang mga sakop ang mga dokumento aron paglibre sa ilang gironda. Dili kaha biktima sa hulidap si Mr. Maria? * * * Magpasalamat ko sa grupo nila ni Atty. Irene Caballes sa Public Attorney’s Office ug sa iyang mga kanhi kauban nga karon nag-private practice na kay mipakita lang gihapon og gugma sa pag-serbisyo sa katawhan. Taliwa sa short notice niadtong Sabado, misanong sila sa akong imbitasyon sa among programa nga “Barangayan” sa Barangay Banilad ning syudad. Wa mi nila pakyasa ug mitambong gyud sila si Atty. Caballes, Atty. Desiree Joyce Santiago ug Atty. Alfred Yann Oguis. Sila maoy mitubag sa mga punto legal nga gipasupot sa listening public agig hulip temporaryo ni Atty. Fritz Quiñanola nga na-busy sab niadtong higayuna kay gi-require pagpatambong sa graduation rites sa College of Law sa University of the Visayas isip usa ka professor. Wa igsapayan sa tulo ka mga abogado ang paghatag og libreng serbisyo taliwa sa grabeng kainit sa panahon ug grabeng problema sa traffic sa Banilad. Ang ubang mga kanhi PAO lawyers wa na lang makatambong kay dunay previous commitments. Sa performance nga akong nakita sa maong mga abogado, akoy giusikan kun hingpit ni silang mangawagtang sa serbisyo sa gobyerno. Mao nga bisag maikog ko ani nila, mangahas lang gihapon ko sa pagdapit sa ilang pundok ni Atty. Caballes sa matag adlawng Sabado sa among programang “Barangayan” gikan sa alas tres ngadto na sa alas singko sa hapon kay daghan ang nanginahanglan sa serbisyo sa atong mga abogado. | 
